بە خۆشحاڵییەوە یەکەم کۆهۆرتی گریین بووتکامپ بە سەرکەوتوویی خولی چڕی شیکاری و بینینی داتایان تەواوکرد. تەکنەلۆجیا دەتوانێت وەڵامی زۆرێک لە کێشە ژینگەیییەکان بێت. بە هەنگاوێکی گرنگی دەزانین ئەو کۆمەڵە خۆنەویستەی کار لە بواری ژینگەدا دەکەن توانستی تەکنەلۆجییان پەرەپێبدرێت تا کارەکانیان خێراتر، فراوانتر، و سەردەمیانەتر گەشە بسێنێت. لە کوردستاندا چەند ڕێکخراوێکی ژینگەییی هەن، هەروەها چەندین کەسی ژینگەدۆستی خاوەن بیرۆکەی تایبەتی خۆیان هەن. کە ئامانجی هەریەکێکیان پاراستن و چاککردن و باشترکردنی دۆخی ژینگەی ناوچەکە و زەوییە. ژینگە بوارێکی گەلێک فراوانە، هەر بەشێک لەم بوارە ڕەهەندی جیاوازی لێکدانەوە و لێتەگەیشتنی هەیە. ویستمان دەستێکی هاوکار بین لە پڕکردنەوەی ئەو کەلێنە تەکنەلۆجییەی کە لە وڵاتی ئێمەدا لە بواری ژینگەدا هەیە و یارمەتی ئەم کۆمەڵگە ژینگەدۆستە بدەین لە ڕاستبەکارهێنانی داتاکانیان و بەرهەمهێنانی ڕاپۆرتی ڕوون و وردی پشتبەستوو بە داتا. بۆ پێکانی ئەم ئامانجە پاش بانگەشە و بانگهێشت کردن بۆ بووتکامپەکە، گرین بووتکامپ پێشوازی لە ١٥ بەشداربوو کرد کە سەرجەمی ئەم کاراماییانەیان لە ماوەی چوار هەفتەو نیودا بەدەستهێنا. بەشداربووانمان بۆ بەدەستهێنانی بڕاوانامەی بەشداری کردن و ڕەنگدانەوەی فعلیی کارەکانیان کۆتا پرۆژەی خۆیان لە فێستیڤاڵی بیت پێشکەشکرد و بەڕێز شاهۆز سەیوان بووە براوەەی خەڵاتی یەکەمی پرۆژەی گرین بووتکامپ کە بریتی بوو لە ١،٥٠٠،٠٠٠ دینار. گرین بووتکامپ بەردەوام دەبێت. چاوتان لەسەر ماڵپەڕەکەمان بێت!